القهوة يامن صلى ع النبي
(صلى الله عليه وسلم)
المكونات والمقادير :
فنجان قهوة بُن (خولاني. بريِّة.هرري)
ملعقة صغيرة هيل
كمية قليلة جدا زعفران.
ملعقة خلطة القصيم (حسب الرغبة)
كوبين ماء تغلى فيها المقادير السابقة.
طريقة التحضير:
بسم الله نبدأ وعليه نتوكل…
أولا: نأخذ كمية من البُن الأخضر بمقدار نصف كيلو أو كيلو ونحمسها ونقلبها ونعفسها ونصاليها ونوريها شغلها لين تبدأ رائحتها الزكية ويتحول لونها للبني الغامق هنا السر في قهوة الكيييييف القصيمية وهو زيادة حمستها شوي بحيث تكون حمستها أكثر من حمسة قهوة الجنوب ..
نكمل إذا صارت ريحتها الزكية تطق في الراس وشفتي الدنيا تلف بك وأصابك بعض التعرق في جبينك (حشا صارت مخدرات هذي ) المهم مشوها تكفون .. نكمل ..
إذا مال لونها للبني الغامق بعض الشيء نزليها عن النار وخليها تبرد واطحنيها بمطحنة القهوة بالبيت وانتبهي وأنختك يالسنعه يالقمر ياحورية القهوة ههههههههههههه لا تخلينها ناعمة خليها خشنة شوي تطلع أحلى
هذي من أسرار أم همام
كذا انتهينا من الحمسة نبدأ في صنع القهوة لكن هنا ملاااااااحظة هااااامة:
الخطوة السابقة يمكن الاستغناء عنها تماااام ..
تسيف يا أم همام وانختس؟ (لهجة قصيمية نجدية)
بقولتس الله يهديك ياخيتي ..
يمكن شراء البن محموس ومطحون وجاهز من المحامص ومحلات بيع القهوة ولكن…
ولكن ولكن ولكن لن تحصلي على نكهة الكيف الأصيلة مهما أعجبتك ..
ما مثل حمسة البيت والقهوة زي مايقولون القهوة من حمستها..
نكمل الخطوة الثانية:
نغلي الماء وبعدها نظيف له فنجانين او ثلاث ملاعق كبيرة من البن إللي حمسناه وفتحي عيونك دخيل روحك يالسنعه قسم إن ما انتبهتي لتصير قهوتك تقول علبة ببسي خظيتيها ورجيتيها ليييين فترت يدك هههههههههههههههههه
المهم حطي معها خلطة القصيم (ويمكنك الاستغناء عنها إذا رغبتي في التمتع بطعم القهوة العربية الأصيلة) وخليها تطبخ ع نار هادية من 15-10 دقيقة وكل ما طبخت زين فاحت ريحتها الزكية.. بعدها حطي الهيل والزعفران وخليها دقيقتين ثم نزليها من على النار وخليها تركد دقيقتين أو ثلاث وفرّغيها في دلة القهوة أو الزمزمية ..
وتقدم مع التمر السكري او الخلاص القصيمي ولا مانع إن حطيتي معها الكليجا إي والله الكليجا وما أدراك ما الكليجا
والله والله والله حاقه ما حصلتشي ..
وبالهنا والعافية ياحشماني (ناسي ربعي جماعتي)
أنتظرونا في قهوة الشمال بإذن الله خلفني عليكم خير..
ليست هناك تعليقات:
إرسال تعليق