فتة الدخن بالسمن والعسل والتمر

وبسم الله نبدأ طبخت اليوم


(فتة الدخن بالسمن والعسل والتمر)


هيا استعدوا

مكونات والمقادير:
كوبين دخن
كوبين بر دبي
كوبين ماء
ملعقة طعام ملح
عسل
سمن
تمر

اولا شمَري بلوزتك يابنت ابوها
وخذي لك طاسة وحطي  الدقيق ثم ضيفي لها الملح وضيفي المويه وبعدها اطلقي عنان يديك في العجينه لين تتماسك وتصير زينه ماهي نصها عجينه ونصها دقيق خليك ذيبه وانختك واعجنيه لين يقر عقلها (غير قابل لترجمه) خلي قوامها ثقيل شوي.

ثم روحي وشبي علئ الخبازه واذا حميت صكي بعجينتك وسطها انفداك وانتبهي لاتكون النار قويه ثم  تغدي عجينتك  سودا كنها كفرة شيول الله الله انتبهي لها لاتضحكين القوم عليك

قلّبيها لين تستوي ونختك

ثم روحي خذي لك تمر وشيلي منه النوئ لين تجهز خبيزتك

ثم اذا جهزت روحي صكيبها في حافظه وخذي اي شي نظيف وامسحيه بسمن وفتي به الدخن لين يغدي شذر مذر وضيفي التمر  وشويه من السمن علئ الدخن
ثم ضيفي سمن بعد لين تتشرب السمن نوعا ما وتصير الفته لمّاعه من السمن

ثم ضيفي العسل فوقها ي عسولة المطبخ انتي
وبكذا تصير طبختك اكتملت وكمليها بلعب الخطوه  اهدجي(اهجدي) امزح خليك مره سنعه
وماينقص طبختك ياخلف جدي الا كوب شاهي منعنش
وجعلها مداخيل العافيه

هذي النتيجة إللي تخقق والطعم إللي يهبل ...